സമസ്‌ത സന്ദേശ യാത്ര സമാപിച്ചു; നാടും നഗരവും ഇനി വരക്കല്‍ തങ്ങള്‍ നഗറിലേക്ക്‌

 

(സമസ്‌ത സന്ദേശ യാത്രയുടെ സമാപന സമ്മേളനം മംഗലാപുരത്ത്‌ സമസ്‌ത കേന്ദ്ര മുശാവറ അംഗം അബ്ദുല്‍ ജബ്ബാര്‍ മുസ്‌ലിയാര്‍ മിത്തബയല്‍ ഉദ്‌ഘാടനം ചെയ്യുന്നു)

മംഗലാപുരം : സമ്‌സ്‌ത സന്ദേശ യാത്ര സമാപിച്ചു. മണ്ണും മനസ്സും ഇനി സമസ്‌തയുടെ സംസ്ഥാന സമ്മേളനം നടക്കുന്ന മലപ്പുറം വേങ്ങര കൂരിയാട്ടേക്ക്‌. സമസ്‌ത 85ാം വാര്‍ഷിക സമ്മേളന പ്രചാരണാര്‍ത്ഥം കോട്ടുമല ടി.എം ബാപ്പു മുസ്‌ലിയാര്‍ നായകനായ സമസ്‌ത സന്ദേശ യാത്ര മംഗലാപുരത്ത്‌ ഉജ്വല സമ്മേളനത്തോടെ സമാപിച്ചു. 

ജനുവരി 23ന്‌ തമിഴ്‌നാട്ടിലെ കന്യാകുമാരി കുളച്ചലില്‍ നിന്ന്‌ ആരംഭിച്ച സന്ദേശ യാത്ര നൂറോളം സ്വീകരണങ്ങള്‍ ഏറ്റുവാങ്ങി. തമിഴ്‌നാട്ടിലെ നീലഗിരി ജില്ലയിലെയും ദക്ഷിണ കന്നഡയിലെ മംഗലാപുരത്തും ലഭിച്ച ഊഷ്‌മള സ്വീകരണങ്ങള്‍ കേരളത്തിന്‌ പുറത്തും സമസ്‌ത ഒരു അജയ്യ ശക്തിയാണെന്ന്‌ തെളിയിച്ചു. സമസ്‌തയുടെയുടെയും സത്യസാക്ഷികളാവുക എന്ന സമ്മേളന സന്ദേശവും അറിയിച്ചുള്ള ലഘുലേഖ വിതരണം പല സ്ഥലങ്ങളിലും നാട്ടുകാര്‍ ഏറ്റെടുത്തത്‌ നവ്യാനുഭവമായി. 

ഫെബ്രുവരി 23 മുതല്‍ 26 വരെ നടക്കുന്ന 85-ാം വാര്‍ഷിക സമ്മേളന സൂചകമായി ഓരോ ജില്ലയിലും 85 ബൈക്കുകളില്‍ ശുഭ്ര വസ്‌ത്രധാരികളായ സംഘടനാ പ്രവര്‍ത്തകരും നിരവധി വാഹനങ്ങളും അനുഗമിച്ചത്‌ സന്ദേശ യാത്രക്ക്‌ മിഴിവേകി. ഓരോ സ്വീകരണ കേന്ദ്രങ്ങളിലേക്കും യാത്ര നായകനെയും സമസ്‌ത നേതാക്കളെയും ദഫിന്റെയും സ്‌കൗട്ടിന്റെയും അകമ്പടിയോടെയാണ്‌ ആനയിച്ചത്‌. പ്രധാന നഗരങ്ങളിലെ റോഡിന്റെ ഇരുവളങ്ങളിലും തിങ്ങി നിറഞ്ഞ ജനം യാത്രാ നായകനെയും സമസ്‌ത നേതാക്കളെയും കൈവീശി അഭിവാദ്യമര്‍പ്പിച്ചു. 

മംഗലപുരം ബന്ദര്‍ ടൗണില്‍ നടന്ന സമാപന സമ്മേളനം സമസ്‌ത കേന്ദ്ര മുശാവറ അംഗം അബ്ദുല്‍ ജബ്ബാര്‍ മുസ്‌ലിയാര്‍ മിത്തബയല്‍ ഉദ്‌ഘാടനം ചെയ്‌തു. മംഗലാപുരം ഖാസി ത്വാഖ അഹമ്മദ്‌ മൗലവി അധ്യക്ഷത വഹിച്ചു. കേന്ദ്ര ഹജ്ജ്‌ കമ്മിറ്റിയംഗം അബ്ദുസ്സമദ്‌ പൂക്കോട്ടൂര്‍ മുഖ്യപ്രഭാഷണം നടത്തി.